प्रकृति के प्रकोप(मगही कविता )

प्रकृति के प्रकोप

प्रकृति के प्रकोप साफ दिखाई दे रहल हे ।

जउन बइसाख जेठ में छूट के लूक आउ लहर चले के चाहS हल उहाँ सामन आउ भादो जइसन उमड़-घुमड़ के बादर मूसलाधार बरस रहल हे ।

एक दने जहाँ बइसाख जेठ में चिलचिलाइत रउदा में देह जरS हल उहईं आज ठीक दुपहरिया में भादो जइसन घुचघुच अंधरिया घेरले हे ।

जहाँ आज छूट के दमाही होबे के दिन हल उहईं आज खेत आउ खरिहान में खड़े आउ काटल रब्बी सड़ रहल हे ।

एक तरफ कोरोना आउ दोसर ओर प्रलय के नजारा ।

हे भगवान ! ई का कयलS तू ?

चले के चहत हल लुक आउ लहSरिया से

ओहे बइसाख जेठ घुमड़े बदSरिया।

खेत - खरिहान सब रबिया सड़ित हई ।

ठीक दुपहरिया में घेरले अंधरिया ।।

सामन भदोइया में बूंद न बरSसS हलइ ।

चइत बइसाख जेठ करिया कजSरिया ।।

सावन भादो में बादर के ताकइत-ताकइत आँख पथरा जा हल बाकि एगो बूंद न परS हल । 

आज बइसाख में कजरी सजल हे ।

माथ पर हाथ धरी रोबत किसनमा से  

उठत किसनियाँ के हिया में लहरिया ।।

हाय भगवान ! तोरा लजियो न लगो आजS

कउन सुखनिन्दिया तू सुतलS सेजरिया ?

भोगे संत्रास लिखल जग के विनाश आज ।

कने जाके छिपलS तू तानी के चदरिया  !

झरतS नयन,  न मिलत चितचैनS से

सगरो प्रलय के परल पिपकरिया !

कवि चितरंजन 'चैनपुरा' , जहानाबाद, बिहार, 804425