बेच जा के तरकारी("मगही कविता ")

बेच जा के तरकारी("मगही कविता ")

***************

ना ह शिक्षक सरकारी तो

बेच जा के तरकारी।

रोक ल अप्पन ज्ञान के गंगा

मन चंगा तो कठौती गंगा,

आॅन लाइन के राग न गाव

के करतो अब माथामारी।

ना ह शिक्षक सरकारी तो

बेच जा के तरकारी।

पढ़ल लिखल मजदूर बेचारा

हे ईश्वर अब तोरे सहारा,

मालिक से ना टेर लगाव

कोरोना तोरा ला भारी।

ना ह शिक्षक सरकारी तो

बेच जा के तरकारी।

नियम नियम हे सबके लागी

शिक्षक कब से हे बड़भागी,

ना पढ़ाई तो पइसा कइसन

ना देतो अब कोई उधारी।

ना ह शिक्षक सरकारी तो

बेच जा के तरकारी।

मोबाइल से कर पढ़ाई

कइसन झूठ हे माई गे माई,

लइकन दिन भर सूत रहल हे

तंग हो गेलन बाप मतारी।

ना ह शिक्षक सरकारी तो

बेच जा के तरकारी।

रजनीकांत।

दिव्य रश्मि केवल समाचार पोर्टल ही नहीं समाज का दर्पण है |