ठंढी तोहर बहार आईल बा

ठंढी तोहर त बहार आईल बा ,

जईसे काँधा डोली कहाँर आईल बा ,

ठंढी तोहर त बहार आईल बा ।

गर्मी से त सबके राहत दिहल ,

सबके ठिठुरईलऽ तूँ जाड़ में ।

सुईटर कोट जैकेट पहिनवलऽ, 

तबहुँ कम्पन्न बा अभीं हाड़ में ।।

का जानी कब केकरा का करबऽ, 

का तोहरा मनवाँ में समाईल बा 

ठंढी तोहर त बहार आईल बा ।

लड़िकन के त छूअबऽ नाहिएँ, 

चाहे कतनों रहिहें उ त उघारे ।

बुढ़वन के तूँ त छोड़बऽ नाहिएँ ,

लगबऽ जीवने से तू त उबारे ।।

कतना बुढ़वन के ऊपर भेजलऽ, 

तोहरो मनवाँ बड़ा बउराईल बा ,

ठंढी तोहर त बहार आईल बा ।

गरीब असहाय के ना सोचलऽ ,

कईसे जीयत बा उहो संसार में ।

आगे बा एगो ओकरो त सहारा ,

दिने राते तापत बा ऊ जाड़ में ।।

ढेर तूँ तड़पवलऽ ढेर तपवलऽ ,

जाड़ से खुशी सब भूलाईल बा ,

ठंढी तोहर त बहार आईल बा ।

ठंढी से स्कूलो तूँ बंद करवलऽ ,

कोई के ठंढिए लागे के डर से ।

पढ़ल खेलल मुश्किल भईल बा ,

कबहूँ निकलत नईखे घर से ।।

अबहूओं से त अब रहम तू कर ,

तोहरा डरहीं सभे त डेराईल बा ,

ठंढी तोहर त बहार आईल बा ।

पूर्णतः मौलिक एवं

अप्रकाशित रचना

अरुण दिव्यांश 

डुमरी अड्डा 

छपरा ( सारण )

बिहार  ।

हमारे खबरों को शेयर करना न भूलें| हमारे यूटूब चैनल से अवश्य जुड़ें https://www.youtube.com/divyarashminews https://www.facebook.com/divyarashmimag